A FUITINA RI NINU RUCCHETTU 

     

           Amici abbicinati a stu carrettu

semu vinuti, pi cuntari nfattu

seddu ca m’accumpagna lu ntillettu

riri vulissi nu riscussu esattu

nun parru sporcu vi parru currettu

se nta la rima mia nun sugnu esattu

sequitu lu stissu lu caminu

parrannu ri st’amicu rutulinu.

L’ebbica ci curpa frati Ninu

nfami bisognu chi pazzii fa fari

semu arrivati nta tempu mischinu

e pi la fami n’ama assughittari

pi lu bisognu stu sceccu co schinu

sta picciuttedda s’arrivavu a puttari

puttanici a mangiari tutti l’uri

senza stancari ci parravu r’amuri.

Ala fossa mi lu portu stu ruluri

iu su matri ri sta sbinturata

fighia ri la me casa era lu ciuri

ora ri quappa siri schifiata

fighia ca t’addivai cu tanta amuri

rimmi cu t’inzignau sta mala strata

fighia fighiuzza mia arma nuccenti

comu ti cunzumau stu gran fitenti.

Mamma voghiu pirdunu a sti mumenti

nun sugnu persa e manchu cunzumata

chistu è me maritu ca prisenti

e comu l’autri sugnu maritata,

nenti m’importa ch’ è meghiu ri nenti

nun m’intaressa s’è ri menza parata

mamma lu mariteddu è bisugnusu

m’abisugnau e mi ni fici usu.

Bona bajascia a stu cosa fitusu

ciami maritu e ci runi st’anuri

comu t’abbicinasti a stu rugnusu

e ni rasti stu ranni sdisanuri,

amici a la me casa è luttu ciusu

senza fatica ettu li sururi,

suru p’affruntu e pi la pena amara

pi causa ri sta ranni tappinara.

Nun m’affiniti la diletta cara

nun pistati la cura a lu sirpenti

quannu vi incia la caurara

tannu era bonu nun era fitenti

ora mi vuliti alla mannara

e mi frustati a menzu tant’aghenti

ebberu ca ci nascii ribusciatu

ma comu ora nun ci avia  ncappatu.

Mischinu criaturi si affruntatu

sta fuitina ti livau l’anuri

omu schifusu vili sbinturatu

omu senza virgogna ne russuri

tu omu tantu ranni e nta su statu

tuttu curpitu e cinu  ri rulura

tu  pani friscu cerchi nta lu furnu

ratti a Diu e scuditi lu munnu.

Ratici locu nta lu mari funnu

nfami ca cunzumau na picciridda

nfami di lu diavulu si alunnu

ti prufittasti ri na babbulidda

speru a fari la morti ri lu tunnu

e poi salatu comu l’aulidda

me maritu ci curpa l’ammazzatu

ca rintra mi purtau stu scunzulatu.

Zitta a mugheri mettiti ri latu

picchì mi sentu lu cori firutu

se rintra ti purtai stu struppiatu

comu sanzali lu circai  p’aiutu

nun nti lu purtai  pi n’ammuratu

a st’omu vili cosa di rifutu,

comu mi cunzumau na famighia

st’annetta cessa  manu di rarighia.

Ora mi susu e sfasciu li brighia

assai v’allargati allu parrari,

nun curpu iu curpa vostra fighia

ca sempri mi parraia ri maritari,

quannu ni ni fuemmu i primi mighia

iu rappressu nun ci putia arrinari,

curria comu na pazza nta la via

facennu prescia  ri cuntinu a mia.

Si veru ca prescia ti facia

prestu vulia arrivari allu parmentu

iu mischina se chi mi criria

cent’anni mi paria rogna munentu

lu cori forti, forti mi battia

ca virriri  vulia lu spaventu,

chi sapia ca l’ogghiu era finutu

ca iu parraia e tu arristasi mutu.

Bonu è accurdatu stu liutu

rogna fruttu a so temtu matura,

partisti comu ngnaddu arrisurbutu

e ci facisti sta bedda fiura,

viri ca ciui si npiru uddutu

viri ca nun si presta la natura

l’aghenti a la so casa lassa stari

e ti ni vai cu Masi a scupari.

Povira fighia ora comu a fari

ora senza maritu e senza anuri

meghiu ti pighi la strata ri mari

e ni levi ri la facci stu russuri,

quannu nascisti nti putia ammazzari

lu viddicu ti sciughia senza ruluri

fighia ca t’ddivai nta bianchi panni

ora na ratu st’affruntu tantu ranni.

Mamma mi sentu ammenzu tanti affanni

mi sentu misa nta cardu ri ciova

cu mi fa gnizioni cu lavanni,

cu ri cuntinu la ciaia rinnova,

meghiu ca mi ittaia ra cava ranni

mancu arrivai a virriri la prova

e ora mattiddata ri cuntinu

mavissi ruttu l’anchi su matinu.

C’aviitu lu vermi taghiarinu

chi ti vinia la roghia o lu ruluri

mputiitu fari bagnoli ri vinu

ca tiniisti cu s’appagnaturi

cu ti paria ca era Musulinu

chi llu viristi ch’era senza caluri

comu ti purtau a la ruvina

stu zuccu sfattu tiratu ra cina.

Comu aghia fari povira mischina

sentu ca la me vita si cunzuma

rintra lu cori miu aghiu na spina

e na firita ca ciui nun s’agguma

nun ci po mericu e mancu miricina

e ciui la curu e ciui s’abbustuma

ciui la varca mia persi la rutta

povira iu sugnu persa tutta.

A lu nfernu vattinni cosa brutta

nesci ri la me casa prestamenti

luntanu o cerchiti na rutta

ammenzu li vosca unni nun c’è aghenti

fatti la truscia mettitilla sutta

parti luntanu di li to parenti

cosa ca sbriugnasti lu paisi

tu bedda facci e stautru beddu ngrisi.

M’ucca  ri mpopulo mi misi

li stissi picciriddi mi ni fanu

amurra mi pighiaru l’aulisi

nun ci su cani e ghiatti callu sanu

stu fattu assai mi suttamisi

sugnu trattatu ciù tintu ri Tanu

ciui nun pozzu sciri pi li strati

i picciotti mi pighinu a pitrati.

Raveru fai pena poviru frati

t’apprufittasti ri na criatura

chiddi comu a tia disgraziati

si meritinu misi a la turtura

fatti pezzi, pezzi  e poi bruciati

pi nun’aviri mancu supirtura

viri ca si ghiuntu al’abbannuni

nun lu capisci ca si mpassuluni.

Iu sugnu vecciu e mi sentu lliuni

mi sentu na culonna ri matrici

quannu m’appoiu nta lu me vastuni

nun mi spusseri mancu lu limpici,

ancora sugnu omu campiunu

ca a settant’anni vaghiardizza fici

ora m’assettu e cessu ri parrari

ca nun mi pozzu tantu affaticari.

Sintiti sintiti chi parrari

vi fà stu cosa carricu ri mali

nta spazzatura nun lu vonu accittari

e mancu lu vonu a lu spitali

o campu santu fatti accumpagnari

e a nuddu annoi  pi li funerali,

urricari ti fai comu ncani

senza parrini e sonu di campani.

Ammazzati ama siri li buttani

ca pi mpupazzu pirdemu li senzi

senza sapiri c’aghiorna rumani

senza pinzari a li cunsiquenzi

manu ni ramu a li ghenti strani

nenti ni mporta di li suffirenzi

però cu sbaghia cu suspiri amari

cerca l’anuri e nun lu po truvari.

Mamma m’ammazzi cu lu to parrari

lu sacciu ca pi mia nun c’è riparu

ora nun  sacciu comu cumminari

sugnu ittata pi lignu ri varu,

fulmini ri lu celu c’arrivari

a stu tiranni facci ri maiaru

na pena mi resi ri muriri

l’anuri mi livavu senza siri.

Mi sentu lu cori ntinniriri

sempri si fighia di lu sancu miu,

ora stu fattu sa finiri

n’accumutamu comu voli Diu

pi maritu però nun l’abuliri

picchi lu pani ti lu uscu iu

ciui l’anuri si persi e nun torna

santa pacenzia suportu li corna.

Ora finiu lu nostru parrari

ngnuri pighia li retini a li manu

punci lu sceccu cumincia a cacciari

prega st’amici ca largu ti fanu,

sonici forti fatti sintiri

saluta a tutti ca ninama ghiri.

CARNEVALE 1928

                                   Buscemi Paolo

---